Në tetor të vitit 2023 aktori i famshëm, Matthew Perry, ndërroi jetë në moshën 54-vjeçare, nga efektet akute të ketaminës. Lidhur me vdekjen e tij kanë dalë në dritë detaje të reja. Një burim hetimor nga policia i ka thënë “PEOPLE” se hetimi i tyre për vdekjen e Matthew Perry nga ketamina është afër përfundimit.
Policia beson se disa persona duhet të akuzohen. Burimi thotë se Zyra e Prokurorit të Shteteve të Bashkuara të Amerikës do të marrë vendimin përfundimtar nëse do të ngrejë akuza apo jo. Mënyra e vdekjes së tij u cilësua aksidentale. Një raport autopsie në dhjetor tregoi se ai vdiq nga efektet akute të ketaminës, me faktorë të tjerë kontribuues përfshirë mbytjen, sëmundjen e arterieve koronare dhe efektet e buprenorfinës, që është një medikament i përdorur për trajtimin e çrregullimit të përdorimit të opioidëve, sipas raportit.
Në dhjetor, Mjeku Ligjor i Qarkut Los Angeles mbylli hetimin e tij për vdekjen e Perry-t. Në maj, LAPD tha se pas lirimit të raportit nga mjeku ligjor, LAPD filloi një hetim për rrethanat e mbidozës së tij. Në maj, një burim hetimor nga LAPD tha se departamenti kishte punuar me DEA dhe Inspektorin Postal të SHBA për të përcaktuar se ku erdhi ketamina që vrau Perry-n. Hetimi i policisë filloi në dhjetor, pas raportit të mjekut ligjor.
Në kohën e vdekjes së tij, Perry po i nënshtrohej terapive me infuzione ketamine, sipas autopsisë së tij. Një vit përpara vdekjes së tij, ai kishte treguar në kujtimet e tij “Friends, Lovers, and the Big Terrible Thing” për luftën e tij me varësinë.
“Desha të ndaja kur isha i sigurt se nuk do të kthehesha më në anën e errët,” i tha Perry “PEOPLE” për një rrëfim në vitin 2022, duke shtuar:
Duhej të prisja deri sa të isha mjaft i sigurt se isha i pastër nga alkooli dhe varësia për ta shkruar të gjithë historinë. Isha mjaft i sigurt se do t’i ndihmonte njerëzit nëse e bëja.
