Gjyqi për padinë për shpifje të Johnny Depp kundër ish-bashkëshortes Amber Heard morën një tjetër zhvillim ditën e djeshme ku tema kryesore ishte xhelozia dhe abuzimi. Katër persona që dikur ishin shumë të afërt me Depp-in përshkruan uljet dhe ngritjet e aktorit nga “ylli më i madh i filmit në botë” në një njeri që luftonte me drogën, paratë dhe aftësinë për t’u shfaqur në kohë në sheshxhirim.
Me urdhër të avokatëve që përfaqësonin Heard-in, dëshmuan një agjent, një ish-menaxher biznesi, një mik i Depp-it për gati katër dekada dhe një aktore që dikur kishte një lidhje me Depp-in. Sipas Ellen Barkin, Depp ishte një burrë kontrollues, xheloz, i zemëruar edhe në vitet 1990, kur të dy ishin të lidhur. Barkin tha që Depp do ta pyeste atë gjithmonë “Me kë po shkoni? Çfarë bëre natën e kaluar?”.
Avokatët e Heard po përpiqen të minojnë padinë e Depp për shpifje kundër saj. Depp thotë se një artikull i vitit 2018, i shkruar nga Heard në The Washington Post, e portretizoi atë në mënyrë të padrejtë si një dhunues në familje dhe i kushtoi atij një karrierë mjaft fitimprurëse në Hollywood, e cila përfshinte ekskluzivitetin e filmit “Pirates of the Caribbean”.
Depp ka dëshmuar se ai kurrë nuk e ka goditur Heard dhe se ai ishte viktimë e abuzimit të shkaktuar prej saj. Por avokatët e Heard thonë se këtyre mohimeve u mungon besueshmëria, sepse ai shpesh pinte dhe përdorte drogë deri në pikën më kritike. Gjatë dëshmisë së Barkin, ajo u shpreh se Depp “gjithmonë pinte alkol ose duhan” ose merrte droga të tjera të paligjshme. Ajo tha se ishte në lidhje me Depp për rreth tre deri në pesë muaj dhe e karakterizoi lidhjen si më shumë seksuale sesa romantike. Barkin luajti bashkë me Depp në “Fear and Loathing in Las Vegas”. Gjatë xhirimeve, Barkin tha se Depp hodhi një shishe verë në drejtim të saj ndërsa ai po zihej me disa miq në një dhomë hoteli. Megjithatë, ajo tha se nuk e dinte pse e hodhi shishen.
