Louis Vuitton dhe Sotheby’s, shtëpia lider në botë e ankandeve të artit dhe luksit, do të zhvillojnë një ankand bamirësie me 200 palë atlete me kuti të edicionit special të Louis Vuitton dhe Nike Air Force 1 nga i ndjeri Virgil Abloh. Të ardhurat do të shkojnë për Fondin e Bursave Virgil Abloh “Post-Modern”, që në partneritet me Fondin e Bursave të Modës, mbështet studentët me ngjyrë në Shtetet e Bashkuara, sipas dëshirës së stilistit.
Duke filluar nga 2,000 dollarë, 200 palët, të disponueshme në një sërë numrash, janë paraqitur në modelet ikonike të lëkurës Monogram dhe Damier të Louis Vuitton. Louis Vuitton x Nike Air Force 1 nga Abloh u prezantuan për herë të parë në qershor 2021 gjatë koleksionit për burra Pranverë/Verë 2022. Çdo palë do të dalë në ankand së bashku me një kuti ekskluzive portokalli gjithashtu nga koleksioni, riinterpretuar nga arkivat e Maison. Përpara vdekjes së tij në nëntor 2021, Abloh ishte i përfshirë drejtpërdrejt në organizimin e ankandit dhe ngjarjeve rreth tij.
Nike Air Force 1 është projektuar në vitin 1982 dhe është një nga atletet më ikonike të krijuara ndonjëherë. Abloh bashkëpunoi me Nike duke bashkuar kodet klasike të atleteve me kodet dhe materialet e Louis Vuitton në homazh të kulturës hip-hop. Modelet u zhvilluan nga atelieja e këpucëve e markës në Fiesso d’Artico, Itali.
Virgil Abloh ishte një prej talenteve më të mëdha të botës së modës. Një sipërmarrës dhe Dj amerikan, i cili ka qenë drejtor artistik i koleksionit të veshjeve për meshkuj tek “Louis Vuitton” që nga marsi i 2018-ës. Abloh ishte gjithashtu drejtori ekzekutiv i markës “Off-White”, në Milano, një shtëpi mode që ai vetë e themeloi në 2012.
Ishte amerikani i parë me origjinë afrikane që u bë drejtor artistik i një shtëpie mode tepër luksoze si dhe u emërua nga revista “Time” si një ndër 100 njerëzit më me influencë në botë. Familja e tij zbuloi se dizajneri kishte mbi dy vite që luftonte me një formë të rrallë, agresiv të kancerit. Thuhet se Virgil u diagnostikuar që në 2019 me këtë sëmundje. Ai ishte i njohur për guximin dhe optimizmin e tij që nuk u lëkundën kurrë. Ishte shumë pro dhe punonte për të patur barazi në art.
