Nga Tirana, kryetari i Parlamentit të Bullgarisë, Rossen Jeliazkov tha se po punohet që brenda vitit të vendoset linjë ajrore direkte mes Shqipërisë dhe Bullgarisë. Sipas tij, kjo linjë ajrore do t’i japë një hov të ri turizmit mes dy vendeve. Komentet i bëri në një konferencë shtypi me homologen Lindita Nikolla.
Brenda një viti, do të kemi linjë të rregullt ajrore mes dy vendeve. Diçka për të cilën po punojmë fort, në bazë të modelit të qëndrueshëm të suksesit. Kjo do t’i japë potencial tjetër turizmit të dy vendeve. Po ashtu, do të inkurajojmë edhe mundësi të tjera të papërdorura deri më tani për shkëmbim të mallrave.
Kreu i Kuvendit të Bullgarisë tha se Shqipëria është kampione e Ballkanit për sa i takon udhës së saj drejt integrimit në familjen europiane.
Konkluzionet e Komisionit Europian sa i përket treguesve të përparimit të Shqipërisë janë të përkrahura nga ana jonë. Shqipëria e ka përkrahjen e palëkundur të Bullgarisë. Ne mendojmë se në rrugën e integrimit duhet të jetë kryefjalë parimi i meritës. Në këtë aspekt, Shqipëria është kampione e rajonit. Ajo ka përmbushur të gjitha detyrimet e veta të politikës së jashtme.
Ai shtoi se “Shqipëria ka një pozicion të palëkundur sa i takon luftës në Ukrainë dhe se përmbush të gjitha detyrat e saj të lidhura me nismat rajonale”. Për kreun e Kuvendit të Bullgarisë mes dy vendeve nuk ka çështje të hapura, përkundrazi dialogu politikë është i nivelit më të lartë.
Gjatë takimit patëm një dialog intensiv dhe interesant. Nënvizuam marrëdhëniet tona edhe në kontekstin e integrimit në BE. Po ashtu diskutuam dhe në kuadër të sfidave rajonale, si edhe sa i takon rendit ndërkombëtarë. Folëm dhe në aspektin e marrëdhënieve parlamentare mes dy vendeve tona. Mes vendeve tona nuk ka çështje të hapura. Dialogu politik është në marrëdhëniet më të mira. Eshtë konfirmuar dhe sot kjo marrëdhënie pozitive, ku zonja Nikolla pranoi ftesën për të ardhur në Sofje.
Sa i takon marrëdhënieve ekonomike, Jeliazkov u shpreh se korridori tetë do të jetë një mundësi tjetër për shkëmbimet tregtare dhe rritjen e investimeve të ndërsjella. Ai po ashtu vlerësoi Shqipërinë për respektimin e minoriteteve.
Morëm konfirmim për garantimin e të drejtave të minoritetit bullgar në Shqipëri. Vlerësojmë përpjekjet për këtë. Në bazë të kësaj, edhe përkrahje edhe më të fortë në rrugëtimin evropian të Shqipërisë. Me grupin e miqësisë jemi të kënaqur që të zhvillojmë dialogun politik.
