Deri në vitin 2030 mund të shohim ardhjen e vaksinave të personalizuara të mRNA-së kundër tumoreve, sëmundjeve kardiovaskulare dhe atyre autoimune. “The Guardian” raporton njoftimin e kompanisë amerikane Moderna, e cila po përdor përvojën e fituar me prodhimin e vaksinave kundër COVID-it për të përshpejtuar kërkimet në këtë fushë.
Falë terapisë së avancuar, pra procedurës së përshpejtuar të miratimit, tashmë kompania ka marrë rezultate inkurajuese. Këto zhvillime premtojnë të revolucionarizojnë të ardhmen e mjekësisë, duke ofruar zgjidhje efektive për parandalimin e tumorit, sëmundjeve kardiovaskulare e atyre autoimune. Vaksina do të bëhet realitet brenda dekadës së ardhshme, duke ofruar një mjet të fuqishëm parandalues të sëmundjeve për miliona njerëz në mbarë botën.
Falë sukseseve të arritura me vaksinat kundër COVID-it, kërkimi i vaksinës kundër kancerit është përshpejtuar ndjeshëm, duke arritur ekuivalentin e 15 viteve progres në vetëm 12 deri në 18 muaj.
Sipas Paul Burton-it, shefit mjekësor të Moderna-s, kompania mund të ofrojë vaksina efektive kundër tumorit në vetëm pesë vjet, duke shpëtuar kështu një numër të madh jetësh. Falë këtyre vaksinave të personalizuara do të bëhet i mundur luftimi i shumë llojeve tumoresh në shkallë globale.
Vaksinat mRNA përfaqësojnë një kufi të ri në luftën kundër tumoreve. Procesi fillon me një biopsi të qelizave kancerogjene, që synon identifikimin e mutacioneve jo të pranishme në qelizat e shëndetshme. Më pas, një algoritëm identifikon mutacionet që nxisin rritjen e tumorit. Në këtë pikë, krijohet një molekulë e ARN-së së dërguar (mRNA) me udhëzime për prodhimin e antigjeneve të nevojshme për të stimuluar një përgjigje imune.
Pasi injektohet, mRNA transformohet në pjesë proteinike të ngjashme me ato që gjenden në qelizat e kancerit. Qelizat imune i njohin këto proteina dhe shkatërrojnë qelizat kancerogjene që përmbajnë të njëjtat proteina. Dorëzimi i këtyre vaksinave mRNA përfaqëson një zhvillim të rëndësishëm në luftën kundër kancerit, duke ofruar shpresë të re për pacientët. Por, sado premtues ende nevojiten më shumë kërkime për të kuptuar plotësisht efektivitetin e tyre.
