Kryediplomati i Bashkimit Evropian, Josep Borrell niset për një udhëtim shumëditor në Lindjen e Mesme për të bërë fushatë për një armëpushim, me ndalesa në Egjipt dhe Liban, por jo në Izrael.
Josep Borrell planifikon të takohet me presidentin egjiptian, Abdel-Fattah al-Sissi në Kajro të hënën dhe gjithashtu të vizitojë pikën kufitare Rafah në Rripin e Gazës”, sipas zyrës së Shërbimit të Jashtëm të BE-së në Bruksel. Një takim me ndërmjetës nga Egjipti, Katari dhe Shtetet e Bashkuara është në axhendë, njoftoi zyra e tij.
Nesër, zyrtari i lartë Borrell planifikon të takohet me ministrin e Jashtëm të Egjiptit, Badr Abdel-Atty, si dhe të marrë pjesë në një takim të Ligës Arabe. Të mërkurën e të enjten, ai do të jetë në Liban, ku do të takohet me kryeministrin, Najib Mikati, kryetarin e parlamentit, Nabih Berri dhe komandantin e Forcave të Armatosura libaneze, gjeneralin Joseph Aoun.
Ai do të takohet edhe me ministrin e Punëve të Jashtme dhe Emigrantëve të Libanit, Abdallah Bou Habib. Borrell do të diskutojë me homologun e tij libanez mbështetjen e BE-së për “rezistencën dhe stabilitetin e Libanit” dhe rolin e Libanit në rajon.
Një vizitë në Izrael nuk është planifikuar, sipas deklaratës.
Borrell ka kritikuar vazhdimisht veprimet e Izraelit në Rripin e Gazës, duke dënuar gjithashtu “sulmet e tmerrshme terroriste” të 7 tetorit, të cilat lanë rreth 1 mijë e 200 njerëz të vdekur në Izrael e 250 të marrë peng. Megjithatë, ai i tha revistës “Foreign Policy” në maj se një tmerr nuk mund të justifikojë një tjetër.
Sipas Ministrisë palestineze të Shëndetësisë të kontrolluar nga Hamasi, rreth 41 mijë njerëz në Gaza janë vrarë në konflikt. Bisedimet për një armëpushim midis Izraelit dhe Hamasit nuk kanë bërë përparim prej muajsh.
Sipas një raporti në “Financial Times”, ushtria amerikane tashmë po përgatitet për një kolaps të negociatave. Armëpushimi lidhet edhe me shpresën për të shmangur një zgjerim edhe më të madh të luftës.
