Sekretari amerikan i Shtetit, Antony Blinken, sot qëndron në Egjipt dhe Izrael, në kuadër të përpjekjeve për të siguruar armëpushim në Gaza. Fillimisht do të takojë presidentin egjiptian, Abdel Fattah al-Sisi, në Kajro përpara se të udhëtojë në Izrael, që të bisedojë me kryeministrin Benjamin Netanyahu dhe ministrin e Mbrojtjes, Yoav Gallant. Gjatë javës, diplomati i lartë amerikan do të ndalet edhe në Jordani e Katar.
Lufta në Gazë nisi tetorin e kaluar kur Hamasi, grup i shpallur terrorist nga Amerika dhe vende të tjera, sulmoi Izraelin, duke vrarë mbi 1.200 njerëz e mori peng qindra të tjerë. Në përgjigje, Izraeli po zhvillon një fushatë intensive sulmesh në Gaza. Gjatë saj, sipas autoriteteve të Hamasit, janë vrarë mbi 37 mijë njerëz.
Vizita e Blinkenit vjen pasi më 31 maj, presidenti amerikan, Joe Biden, prezantoi një plan për armëpushim nga Izraeli. Ky dokument përfshin fundin e përhershëm të armiqësive, lirimin e pengjeve izraelite e të të burgosurve palestinezë, si dhe rindërtimin e Gazës.
Ndërkaq, politikani izraelit me ndikim, Benny Gantz po largohet nga qeveria emergjente e formuar në Izrael pas sulmit nga Hamasi. Kjo për shkak të mosmarrëveshjeve rreth opinioneve mbi të ardhmen e Rripit të Gazës.
Ish-ministri i Mbrojtjes, 65 vjeç kishte kërcënuar se do të merrte këtë hap nëse qeveria e kryeministrit Benjamin Netanyahu nuk arrinte të hartonte një plan për një urdhër të pasluftës në Rripin e Gazës. Ultimatumi i Gantzit ndaj Netanyahut për këtë çështje, skadoi të shtunën e 8 qershorit.
Për shkak të shpëtimit dramatik të katër pengjeve nga Rripi i Gazës, ai shtyu një konferencë të planifikuar për shtyp në minutën e fundit. Sipas Gantz-it, dorëheqja nga qeveria e udhëhequr nga Netanyahu prek edhe anëtarët e tjerë të partisë së tij të Unitetit Kombëtar.
Megjithatë, ai nuk do të rrëzojë udhëheqjen e Izraelit me këtë hap, sepse kabineti fetar i djathtë i Netanyahut ende ka një shumicë prej 64 nga 120 vende në parlament edhe pa partinë e Gantz-it.
Ish-gjenerali Gantz iu bashkua qeverisë së Netanyahut si ministër pa portofol pas sulmit të paprecedentë nga Hamasi dhe grupet e tjera terroriste, me qëllim që të dërgonte një sinjal uniteti. Partia centriste Uniteti Kombëtar, e udhëhequr nga Gantz, në fakt është në opozitë.
