Në 10-vjetorin e Procesit të Berlinit, pjesëmarrësit nga gjashtë vendet e Ballkanit Perëndimor ranë dakord për elementët e mëposhtëm për të thelluar bashkëpunimin rajonal, si dhe për të avancuar tregun e përbashkët rajonal e marrëdhëniet e fqinjësisë së mirë. Ministria e Jashtme gjermane publikoi një deklaratë me përmbledhje të arritjeve:
– Një arritje e dukshme është Marrëveshja për Aksesin në Arsimin e Lartë dhe Pranimin në Studimet e Lartë në Ballkanin Perëndimor. Kjo marrëveshje synon t’u japë studentëve të drejtën për të ndjekur studimet në institucione të arsimit të lartë të akredituar dhe promovon lëvizshmërinë e studentëve e do të përmbyllet në Samitin e Procesit të Berlinit më 14 tetor të vitit 2024.
– Pjesëmarrësit miratuan një deklaratë mbi Standardet Rajonale të Ekzaminimit të IHD-ve për gjashtë vendet e Ballkanit Perëndimor. Këto standarde synojnë harmonizimin e politikave të investimeve me standardet e BE-së dhe praktikat më të mira ndërkombëtare, duke e bërë kështu rajonin më tërheqës për investitorët e huaj.
– Një deklaratë e përbashkët për Aksesin dhe Bashkëpunimin në Infrastrukturën e Kërkimit dhe Inovacionit u ra dakord nga pjesëmarrësit që do të nxisë partneritetet kërkimore e inovative dhe do të lehtësojë një ekosistem dinamik rajonal të inovacionit.
– Së fundi, pjesëmarrësit e gjashtë vendeve të Ballkanit Perëndimor nënvizojnë përkushtimin e tyre për bashkëpunimin rajonal në një Deklaratë të Përbashkët për Rikonfirmimin e Marrëdhënieve të Fqinjësisë së Mirë dhe Bashkëpunimit Rajonal me rastin e 10-vjetorit të Procesit të Berlinit, me synim miratimin e saj në Samit.
Ne presim me padurim që të përdorim këtë moment pozitiv për të vazhduar fokusimin e përpjekjeve tona në avancimin e bashkëpunimit rajonal dhe përshpejtimin e integrimit në Bashkimin Europian. Ne rikonfirmojmë vullnetin tonë për të përfunduar marrëveshjet dhe deklaratat e sipërpërmendura nga Samiti i Procesit të Berlinit më 14 tetor 2024.
