Kryetari i grupit parlamentar të Partisë Demokratike, Gazment Bardhi reagoi sot pas mungesës së zbardhjes së vendimit të Gjykatës së Apelit për dënimin e deputetit demokrat Ervin Salianji. Në një deklaratë për mediat, Bardhi u shpreh se “moszbardhja e vendimit të gjykatës përbën një mohim të së drejtës së deputetit Salianji për të paraqitur rekurs në Gjykatën e Lartë dhe për të kërkuar drejtësi në shkallët e tjera të gjyqësorit, brenda një afati të arsyeshëm”.
Burgosja politike e nënkryetarit të grupit parlamentar të Partisë Demokratike Ervin Salianji, po shoqërohet edhe me një skandal tjetër nga Gjykata e Apelit. Në shkelje flagrante të ligjit, në tejkalim të çdo afati ligjor dhe të arsyeshëm, trupa gjykuese po refuzon të zbardh vendimin gjyqësor mbi bazë e të cilit një deputet i opozitës ndodhet në burg, tha Bardhi.
Sipas Gazment Bardhit, “sot një deputet i opozitës ndodhet në burg, pa një vendim gjyqësor të arsyetuar dhe pa shpjeguar arsyet e kësaj burgosjeje”. Ai theksoi se “vetëm në regjimet totalitare kundërshtarët politikë burgosen për lirinë e fjalës dhe u mohohet edhe mundësia për të apeluar vendimin, përmes metodave kriminale të vonesës për zbardhjen e vendimit gjyqësor”. Po ashtu, akuzoi gjyqtarët Elona Toro, Iliba Bezati dhe Gent Shala.
Grupi parlamentar i Partisë Demokratike dënon me forcë shkeljen e vazhdueshme të ligjit nga gjyqtarët Elona Toro, Iliba Bezati dhe Gent Shala, të cilët pasi urdhëruan pa ligj burgosjen politike të një deputeti të opozitës, vijojnë në dhunim brutal të ligjit të mos zbardhin arsyet e këtij vendimi skandaloz. Vetëm regjimet totalitare burgosin kundërshtarët politikë pa dhënë asnjë argument apo shpjegim. Vetëm në regjimet totalitare kundërshtarët politikë burgosen për lirinë e fjalës dhe u mohohet edhe mundësia për të apeluar vendimin, përmes metodave kriminale të vonesës për zbardhjen e vendimit gjyqësor.
