Mark Speich, sekretar i Shtetit për Çështjet Federale, Europiane, Ndërkombëtare e Politikave Mediatike rajonale për landin e Renanisë Veriore-Vestfalisë në Gjermani, pohoi për DW se afrimi i vendeve të Ballkanit do t’i sillte të mira vetë Bashkimit Europian. Speich, i cili nis një tur në Shqipëri, Kosovë dhe Maqedoninë e Veriut thotë se qëllimi i këtyre ndalesave është që të hedhë dritë mbi një fazë kritike të zgjerimit dhe anëtarësimit në Union.
Gjatë kësaj vizite, unë përfaqësoj landin më të populluar të Gjermanisë me 18 milion banorë, zemra e prodhimit industrial në Gjermani dhe jemi shumë të përkushtuar ndaj procesit të zgjerimit.
Speich përcjell bindjen se nga afrimi i rajonit ka një përfitim të ndërsjellë mes tij e Bashkimit Europian nga një perspektivë gjeopolitike, që mund të bëhet një përfitim edhe nga një perspektivë ekonomike.
Do të thoja që në partitë politike kryesore në Gjermani ka një mbështetje të gjerë për këtë proces, por kemi gjithashtu një diskurs publik që është më pak entuziast për zgjerimin, siç vuri në dukje zyrtari i lartë gjerman.
“Kam perceptuar një përkushtim të madh ndaj procesit të zgjerimit dhe procedurave të anëtarësimit në Shqipëri”, theksoi ai, ndërsi pohon se ka parë përmirësime në vendin tonë.
Nga bisedat që kam zhvilluar, mund të shihet qartë që liderët politikë janë shumë të përkushtuar ndaj kësaj. Ata kanë një fokus të qartë te kapitujt që po diskutohen tani, nga njëra anë te çështjet themelore, por gjithashtu edhe te grupi i gjashtë, që lidhet me politikat dhe çështjet gjeopolitike, ku do të thoja se Shqipëria po jep një shembull në rajon përsa i përket angazhimeve ndaj NATO-s dhe parimeve të aleancës perëndimore.
Kështu që, Shqipëria po vendos një shembull të qartë. Ju mund ta ndjeni atë përkushtim e të shihni që teknikisht janë të përgatitur mirë dhe jam i bindur se gjërat mund të ecin përpara. Po ashtu, ne shohim progres në lidhje me vendosjen e parimit të sundimit të ligjit në sistemin gjyqësor. Ende ka sfida, por mendoj se është e rëndësishme që gjërat të ecin përpara, ishte komenti i tij.
