Avokatët e Sean Diddy Combs kanë paraqitur një kërkesë të katërt për lirimin e tij me kusht, duke kërkuar që reperi të dalë përpara gjyqit të tij. Në kërkesën e dorëzuar më 8 nëntor, ekipi juridik i të akuzuarit P.Diddy tregon prova të reja që i konsiderojnë të mjaftueshme për lirinë e përkohshme të tij, shkruan ‘People’.
Combs mbetet pas hekurave pasi atij iu mohua lirimi me kusht nga dy gjyqtarë të ndryshëm federalë. Në shtator, ai u padit me akuzat për trafik seksual, shantazh dhe abuzim. Mbrojtja citon një video të marsit 2016, e përmendur në aktakuzën fillestare kundër themeluesit të Bad Boy Records, e cila dukej se e tregonte atë duke sulmuar dhunshëm një grua në një hotel në Los Anxhelos. Videoja, e cila tregon P Diddy duke sulmuar fizikisht ish të dashurën e tij, Cassie Ventura, është filmuar në Los Angeles tetë vjet më parë. Avokatët e tij thanë se:
Videoja nuk është dëshmi e një akti seksual të detyruar, por është një përfaqësim i një marrëdhënieje komplekse, por dhjetëvjeçare, vullnetare mes Combs dhe viktimës.
Sipas prokurorisë, Diddy sulmoi Cassie Venturën në një hotel në Los Angeles në vitin 2016. Ndërsa ajo po përpiqej të futej në ashensor, ai e kapi nga koka dhe e goditi në dysheme. Pas kësaj, ai dyshohet se e ka goditur me shkelma teksa ajo ishte shtrirë e palëvizur në tokë dhe më pas e ka çuar me forcë në dhomën e tyre të hotelit.
Cassie ka ngritur më parë një padi kundër Combs, duke e akuzuar atë për abuzim fizik dhe seksual prej vitesh. Sipas pretendimeve të saj, gjithçka ka nisur në vitin 2005, kur ajo ishte vetëm 19 vjeçe. Gjatë lidhjes së tyre, Ventura pohoi se Combs e kontrollonte, e abuzonte, madje e detyronte të bënte seks me prostitutat ndërsa ai filmonte skenat. Ajo pretendon gjithashtu se është dhunuar fizikisht dhe droguar.
Combs është deklaruar i pafajshëm për të gjitha akuzat me të cilat përballet. Avokatët e tij kishin propozuar më parë një paketë garancie prej 50 milionë dollarësh. Por duke përmendur ngatërresat e mundshme të dëshmitarëve, dy gjyqtarë refuzuan të lironin manjatin me shumë ndikim nga paraburgimi. Avokatët e Combs po kërkojnë përsëri që klienti i tyre të lirohet në një propozim për lirimin me kusht që ata thonë se është “shumë më i fortë se ai i mëparshmi”.
Ekipi mbrojtës po propozon ndalimin në shtëpi me monitorim të sigurisë gjatë gjithë orarit dhe “kufizime pothuajse totale” në aftësinë e Combs për të kontaktuar këdo përveç avokatëve të tij. Combs aktualisht është i burgosur në Qendrën e Paraburgimit Metropolitan në Brooklyn, të cilën avokatët e tij e kanë quajtur “të papërshtatshme për paraburgim”. Gjyqi i manjatit është planifikuar për në maj 2025.
