Pesë agjentë të Shërbimit Sekret janë pezulluar nga puna pas atentatit ndaj Donald Trump gjatë tubimit të mbajtur në Pensilvani muajin e kaluar. Associated Press, duke cituar një burim të njohur me çështjen, raporton se nga detyra janë pezulluar agjenti special në krye të zyrës në Pittsburgh dhe tre agjentë të tjerë të caktuar në atë zyrë, e cila ishte përgjegjëse për planifikimin e sigurisë përpara tubimit të 13 korrikut në Butler.
Burimi tha se një nga pesë agjentët ishte caktuar në detajet mbrojtëse të Trump. Agjentët janë në leje administrative, që do të thotë se nuk mund të bëjnë punë hetimore apo mbrojtëse. Kongresi po heton gjithashtu incidentin dhe sigurinë nga Shërbimi Sekret. Dhoma e Përfaqësuesve ka ngritur një grup pune për atentatin dhe senatorët kanë kërkuar një sërë të dhënash nga agjencitë federale, shtetërore dhe lokale të zbatimit të ligjit.
Anëtarët e komiteteve përkatëse të Kongresit duke filluar me Komitetin e Senatit për Sigurinë Kombëtare dhe Çështjet Qeveritare janë informuar mbi veprimet e Shërbimit Sekret të SHBA-së. Trump u godit në vesh, por nuk pësoi lëndime të rënda. Një pjesëmarrës në tubim humbi jetën dhe dy të tjerë u plagosën.
Ndërkaq, shërbimet sekrete dhe policia amerikanë kanë arrestuar një person i cili kërcënonte se do të të vriste ish-presidentin amerikan Donald Trump. Pas një operacioni që zgjati për disa orë, autoritetet vunë në pranga 66-vjeçarin Ronald Lee Syrvud, i cili kishte kërcënuar se do të godiste Trump përpara tubimit të tij të planifikuar në Arizona.
Lee Syrvud, i dënuar më herët për krime seksuale, kishte postuar për dy javë me radhë mesazhe në rrjetet e tij sociale duke alarmuar shërbimet sekrete, rreth 1 muaj pasi manjati u qëllua në vesh gjatë një mitingu në Butler. Më herët, lajmi u konfirmua dhe nga vetë Donald Trump, i cili gjatë një interviste në një radio lokale në Arizona, u shpreh se trupat e tij të sigurisë janë të alarmuar dhe nuk dëshirojnë që ai të qëndrojë aty për shkak të një kërcënimi të mundshëm.
