Donald Trump u përfshi në “konspiracion dhe fshehje” i tha jurisë një prokuror gjatë argumenteve mbyllëse në gjyqin penal kundër ish-presidentit amerikan, lidhur me manipulimin e të dhënave të biznesit. Dëshmitarin kryesor të çështjes, mbrojtja e quajti “gënjeshtarin më të madh të të gjitha kohërave” ndërsa jurisë i kërkoi të hedhë poshtë akuzën ndaj klientit të tyre.
Deklaratat kundërthënëse të akuzës dhe palës mbrojtëse, jashtëzakonisht të ndryshme lidhur me vlerësimet e tyre për besueshmërinë e dëshmitarëve e fuqinë e provave, iu ofruan të dyja palëve një shans të fundit për ta bindur jurinë. Pas mbylljes së argumenteve, juria do të tërhiqet për të marrë një vendim lidhur me çështjen e parë penale kundër një ish-presidenti amerikan.
Gjyqi shqyrtoi akuzat se Trump dhe aleatët komplotuan për të bllokuar një histori të turpshme gjatë fushatës presidenciale të vitit 2016, duke bërë pagesa për të blerë heshtjen, përfshirë një aktore të filmave pornografikë, e cila pretendoi se kishte patur marrëdhënie seksuale një dekadë më parë me Trump-in.
Ky rast, në thelbin e tij, ka të bëjë me një komplot dhe fshehje, i tha jurisë, prokurori Joshua Steinglass.
Sot juria mund të fillojë të shqyrtojë marrjen e një vendimi.
Prokurori shtoi:
Ne kurrë nuk do ta dimë nëse kjo përpjekje për të manipuluar votuesit ndikoi në zgjedhjet e vitit 2016, por kjo nuk është diçka që duhet ta provojmë.
Todd Blanche, avokat i Trump-it, i tha jurisë se nuk mund t’i besohet as aktores Stormy Daniels dhe as avokatit të Trump-it që e pagoi atë, Michael Cohen.
Presidenti Trump është i pafajshëm. Ai nuk ka kryer asnjë krim dhe prokuroria nuk e ka përmbushur barrën e provës.
Kur kanë kaluar më shumë se katër javë deponime në gjyqin penal ndaj Trump-it, arritja e një vendimi përbën një detyrë të rëndësishme për jurinë, historikisht të paparë ndonjëherë ndërsa vendos nëse do ta dënojë kandidatin republikan për president përpara zgjedhjeve presidenciale të nëntorit.
Tonet politike u shfaqën hapur kur fushata e presidentit Joe Biden organizoi një konferencë shtypi jashtë ndërtesës së gjykatës me aktorin Robert De Niro. Avokati mbrojtës i kujtoi jurisë se çështja nuk ishte një referendum lidhur me pikëpamjet e tyre për Trump-in.
Prokurori Steinglass u përpoq që në fillim që të zbuste shqetësimet e mundshme të jurisë në lidhje me besueshmërinë e dëshmitarit kryesor të çështjes. Trump dhe ekipi i tij ligjor e kanë denoncuar vazhdimisht dëshmitarin Cohen si gënjeshtar.
Prokurori e pranoi se dëshmia e Danielsit në lidhje me takimin e supozuar të vitit 2006 në një hotel në “Lake Tahoe”, të cilin Trump e ka mohuar, në disa raste ishte për të dëshiruar. Por, ai tha se detajet që ajo ofroi, përfshirë dekorimin dhe atë që tha se pa kur hapi çantën e tualetit të Trump-it, kishin plot detaje që tingëllonin të vërteta. Ai tha se kjo ka rëndësi sepse “përforcon stimulin (e Trump-it) për të blerë heshtjen e saj”.
Historia e saj është e pazakontë. Kjo i bën njerëzit të mos ndihen rehat kur e dëgjojnë. Ndoshta për disa prej jush është e pakëndshme për ta dëgjuar. Por, ky është qëllimi. E thënë thjeshtë, Stormy Daniels është motivi.
Rasti i pagesës doli në pah ndërsa në një regjistrim të ekipit televiziv të emisionit “Access Hollywood” në vitin 2005, Trump dëgjohet tek flet me mburrje për prekje seksuale të grave pa pëlqimin e tyre. Nëse historia e Danielsit do të dilte pas regjistrimit në fjalë, kjo do të kishte minuar strategjinë e Trump-it për të hedhur poshtë ato që dëgjohen duke thënë në regjistrim.
Eshtë kritike të vlerësohet sepse në të njëjtën kohë që ai hodhi poshtë citimet e tij në regjistrime si biseda në dhomën e zhveshjes, Trump po negocionte për t’i mbyllur gojën një aktoreje të filmave pornografikë.
Avokati mbrojtës, Blanche, i cili foli i pari, u përpoq të minimizonte pasojat duke thënë se kaseta e programit “Access Hollywood” nuk ishte një “ngjarje e fundit të botës”. Steinglass pohoi se çështja e prokurorisë nuk varej vetëm te Michael Cohen, ish-avokat personal i Trump-it, i cili e pagoi zonjën Daniels 130,000 dollarë për të heshtur.
Cohen është deklaruar fajtor nën akuzat federale për rolin e tij në pagesat e parave për të blerë heshtjen, si dhe për gënjeshtrat përpara Kongresit. Ai u dënua me burg dhe i është hequr licenca e avokatit, por përfshirja e drejtpërdrejt në çështje e bëri atë një dëshmitar kryesor në gjyq.
Nuk ka të bëjë nëse ju pëlqen Michael Cohen. Nuk ka të bëjë nëse doni të hyni në biznes me Michael Cohen. Ka të bëjë nëse ai ka informacion të dobishëm dhe të besueshëm për të treguar për atë që ndodhi në këtë rast dhe e vërteta është se ai ishte në pozicionin më të mirë për ta ditur.
Trump përballet me 34 akuza për falsifikimin e të dhënave të biznesit, që zakonisht konsiderohet si një kundërvajtje sipas ligjeve të Nju Jorkut. Por, prokurorët thonë Trump i falsifikoi të dhënat e biznesit për fshehur një krim të tjetër, atë të shkeljes së mundshme të ligjit për financimin e fushatës zgjedhore.
Në qendër të gjyqit është shuma prej 130,000 dollarësh, me të cilën ish-avokati i zotit Trump, Michael Cohen e pagoi ish-aktoren e filmave pornografikë Stormy Daniels, për të siguruar heshtjen e saj mbi një marrëdhënie të dyshuar seksuale me Trump-in.
Më pas, sipas aktakuzës, Trump e rimbursoi zotin Cohen dhe pagesën e regjistroi si shpenzim ligjor të kompanisë. Pagesa u bë ndërsa po kandidonte për zgjedhjet presidenciale të vitit 2016.
Avokatët mbrojtës janë përpjekur të ngrenë dyshime mbi besueshmërinë e dëshmitarëve të prokurorisë, kryesisht të dëshmitarit kryesor të saj, Michael Cohen. Ky i fundit tha në dëshminë e tij se ishte ai që e pagoi Daniels-in dhe se Trump e pati miratuar një gjë të tillë e se ishte në dijeni të regjistrimit të parave në mënyrë të paligjshme, si shpenzime ligjore.
Gjatë marrjes në pyetje, avokatët e Trump-it ndoqën strategjinë e vënies në pikëpyetje të besueshmërisë së Cohen-it. Ata e pyetën lidhur me dënimet e mëparshme. Gjatë njërës prej dëshmive, Cohen pranoi se vodhi disa mijëra dollarë nga kompania e Trump-it. Nëse shpallet fajtor, Donald Trump përballet me burg deri në 4 vjet heqje lirie.
