Jemi ende afërsisht dy muaj e gjysmë larg prezantimit të iOS 18 me të gjitha veçoritë e tij me Al dhe pa Al. Ata që dëshirojnë munden që tani të instalojnë iOS 18 beta 2, megjithëse është ende i paqëndrueshëm dhe do ta ulë jetëgjatësinë e baterisë së pajisjes tuaj. Nga ana tjetër, do të merrni disa nga veçoritë jo me Al, duke përfshirë aftësinë për të personalizuar ikonat e aplikacioneve dhe mbështetjen e RCS-së nëse keni miq ose anëtarë të familjes që përdorin telefon Android.
Ndërsa përdoruesit e iPhone janë të emocionuar për sistemin e ri operativ, Mark Gurman i Bloomberg deklaroi se Apple aktualisht po punon në iOS 19 i cili do të prezantohet në shtator të vitit 2025. Nëse po pyesni veten pse Apple po punon në sistemin që nuk do të prezantohet në treg deri vitin e ardhshëm, në fakt përgjigja ka shumë kuptim. Meqenëse kompania është në procesin e zhvillimit të harduerit të saj të përditësuar për vitin e ardhshëm, ajo ka nevojë për sistem të ri për të drejtuar pajisjet në zhvillim.
Përveç prezantimit të iPhone të ri, kompjuterëve Mac dhe tabletëve iPad, Apple mund të prezantojë edhe një version me çmim më të ulët të Apple Vision. Rikujtojmë se Apple rrezikon miliarda euro gjoba pasi Bashkimi Evropian zbuloi së fundmi App Store i prodhuesit të iPhone po shkelte rregullat e konkurrencës digjitale të bllokut. Komisioni Evropian e informoi Apple se rregullat e App Store i pengojnë zhvilluesit e aplikacioneve që t’i drejtojnë lirisht konsumatorët drejt kanaleve alternative për oferta dhe përmbajtje.
Siç thuhet më tej, kjo hap një front të ri në luftën gjithnjë e më të ashpër midis gjigantit të teknologjisë amerikane dhe Brukselit mbi Aktin e ri të Tregjeve Digjitale të BE-së (DMA). Së fundmi, Apple tha se do të vononte paraqitjen e veçorive të AI të njoftuara së fundmi në Evropë për shkak të pasigurive rregullatore të lidhura me DMA. Ligji gjithëpërfshirës synon të frenojë firmat më të mëdha të teknologjisë në botë, përfshirë Apple, duke i detyruar ato të hapen ndaj konkurrencës në 27 vende të BE-së.
