Apple dhe Paramount kanë qenë në bisedime për të krijuar një paketë abonimi në platformat e tyre televizive, sipas Wall Street Journal. Qëllimi i këtij bashkimi është të bëjë një plan që do të përfshijë një abonim në të dyja platformat dhe në total do të kushtojë më pak se paratë që do të paguante një përdorues nëse do t’i bënte veç e veç.
I njëjti burim thekson se diskutimet janë në vazhdim, por ende në një fazë të hershme. Publikimi vëren se bisedimet mes Apple dhe Paramount vijnë në një kohë kur platformat po rrisin kostot e abonimit për të qenë fitimprurës, ndërkohë që shumë klientë po “i braktisin” për të kursyer para. Së fundmi, Apple premtoi dy vjet përdorim falas të funksionit të satelitit, “Emergency SOS” kur prezantoi serinë iPhone 14, por tani e ka zgjatur atë periudhë në një vit tjetër.
Siç e dini, funksioni Emergjenca SOS përdoret për të kontaktuar shërbimet e urgjencës nga vende që nuk mbulohen nga rrjeti celular. Apple njoftoi se periudha pa pagesë e përdorimit të veçorisë për përdoruesit e iPhone 14 që kanë aktivizuar pajisjet e tyre në vendet që mbështesin Emergjencën SOS përmes satelitit përpara datës 15 nëntor të vitit 2023, do të zgjatet edhe për një vit shtesë. Funksioni është aktualisht i disponueshëm në Australi, Austri, Belgjikë, Kanada, Francë, Gjermani, Irlandë, Itali, Luksemburg, Holandë, Portugali, Spanjë, Zvicër, MB, SHBA dhe Zelandën e Re. Nuk ka ende asnjë informacion mbi koston e funksionit pas përfundimit të periudhës falas.
Rikujtojmë gjithashtu se Apple do të paguajë 25 milionë dollarë për të zgjidhur pretendimet e Departamentit të Drejtësisë së SHBA-së se kompania favorizonte në mënyrë të paligjshme punëtorët emigrantë në vend të qytetarëve amerikanë dhe mbajtësve të kartave jeshile për punë të caktuara. Departamenti i Drejtësisë tha se Apple nuk rekrutonte qytetarë amerikanë ose banorë të përhershëm për punë që ishin të pranueshme për një program federal që lejon punëdhënësit të sponsorizojnë emigrantët për kartat jeshile, në kundërshtim me një ligj federal që ndalon diskriminimin në bazë të shtetësisë.
