Ministri për Evropën dhe Punët e Jashtme, Igli Hasani, sot iu bëri thirrje të gjithë qytetarëve shqiptarë jashtë vendit që kanë humbur dokumentin e udhëtimit ose që u ka përfunduar afati i vlefshmërisë, të aplikojnë online në platformën e-Albania për shërbimin “Lejekalimi” në Misionin Diplomatik dhe Postin Konsullor të Republikës së Shqipërisë më të afërt.
Siç theksoi kryediplomati Hasani, kjo mundëson shkurtimin e kohës nëpërmjet shërbimeve konsullore online.
Qytetarët duhet të hyjnë në platformën e-Albania, të zgjedhin shërbimin aplikim për leje kalimi. Pasi të klikojnë “Aplikim i ri”, duhet të plotësojnë formularin elektronik dhe të ngarkojnë dokumentin verifikues.
Në e-mail do t’iu mbërrijë konfirmimi dhe kodi i veçantë i aplikimit. Pas pranimit të aplikimit duhet kryer pagesa dhe duhet dërguar mandati origjinal me postë. Qytetari do të njoftohet elektronikisht për përfundimin e aplikimit.
Ky shërbim mund të merret brenda ditës në rastet e paraqitjes fizike në Ambasadë apo Konsullatë ose mund të kërkohet shërbimi postar me pagesë.
Për shtetasit shqiptarë minorenë që nuk janë pajisur më parë me dokument udhëtimi ose i ka skaduar afati i pasaportës aktuale, njëri prej prindërve ose kujdestari ligjor, duhet të paraqitet fizikisht pranë Misionit Diplomatik më të afërt.
Për më shumë qytetarët mund të klikojnë në: https://punetejashtme.gov.al/aplikim-per-leje-kalimi.
