Po mbahet në teatrin “Ariston” ceremonia e 71-të e festivalit të muzikës Italiane, “Sanremo”, një ndër më të ndjekurit në Europë e sigurisht ndër më të preferuarit në Shqipëri. Festivali mbahet në datat 2-6 Mars dhe sonte pritet finalja e madhe, fituesi i të cilit do të përfaqësojë Italinë në “Eurovision”. Prezantuesi tashmë ikonë i “Sanremo” mbetet Amadeus i shoqëruar në netë të ndryshme nga figura të tjera të njohura si; Rosario Fiorello, Valeria Ceretti, Zlatan Ibrahimović, Negramaro dhe Achille Lauro.
Në dy netët e para të këtij festivali madhështor, 26 konkurrentët prezantuan këngët e tyre përfaqësuese ndërsa në natën e tretë performuan një ‘cover’ që do të ndikonte tek votat e orkestrës. Mbrëmjen që lamë pas ata u rikthyen edhe një herë në skenë për të prezantuar sërish këngët e tyre konkurruese ndërsa sonte na pret finalja. Në “Sanremo” ka disa mënyra votimi duke filluar nga votat e publikut, votat e një jurie profesioniste, votat e orkestrës dhe votat e sondazheve online. Përqindja finale e secilës prej tyre mblidhet për të shpallur fituesin. Sakaq, deri tani kemi një listë të nxehtë me pretendentë dhe me krenari themi se këngëtari shqiptar Ermal Meta, siç e konfirmuam edhe më parë në TAR, mban vendin e parë në të gjitha votimet.
Deri në këto momente top 10 pretendentët për fitore sipas votave të 4 netëve të para janë; 1) Ermal Meta, 2) Annalisa, 3) Willy Peyote, 4) Arisa, 5) Irama, 6) Lo Stato Sociale, 7) Malika Ayane, 8) Extraliscio ft. Davide Toffoto, 9) Orietta Berti, 10) Maneskin.
Pavarësisht se ka patur shumë polemika sa i përket votimeve dhe kësaj renditjeje, publiku i gjerë duke përfshirë edhe ne në Shqipëri mendojmë se ka disa projekte muzikore në këtë kompeticion që nuk janë vlerësuar sa duhet. Sipas nesh, pretendentët për fitore në “Sanremo 2021” duhet të jenë si më poshtë:
1. Ermal Meta – Un Milione di cose a dirti
2. Maneskin – Zitti e Buoni
3. Gaia – Cuore Amaro
4. Aiello – Ora
5. Ghemon – Momento Perfetto
6. Francesca Michielin & Fedez – Chiamami per nome
Megjithatë, teksa jemi në pritje të finales së madhe që do të mbahet sonte rreth orës 21:00 në të gjitha kanalet “Rai”, duam të dimë mendimin tuaj se cila nga këto këngë duhet të jetë patjetër në top 10 në votimet finale të “Sanremo 2021”?
