Grabitja përmes mashtrimit e 140 mijë eurove në një pikë këmbimi valutor në Shkodër, ekstradohet një prej autorëve, i cili po lëvizte nga Sarajeva në Stamboll, me destinacion kryeqytetin e Gjeorgjisë, Tbilisi. Në kuadër të operacionit të koduar “Tracking” të policive shqiptare e turke, u identifikuan tre të dyshuar, shtetas gjeorgjianë.
Dyshohet se mashtruan pronarin e një pike të këmbimit valutor, duke i marrë 140 mijë euro. Për ngjarjen e ndodhur dy ditë më parë në “Zdrale” të Shkodrës, 40-vjeçari i kapur në aeroportin e Stambollit, u deportua sot në Rinas. Gjatë kontrollit fizik iu gjetën 7.500 euro. Vijon puna për arrestimin e dy gjeorgjianëve të tjerë 36 e 45 vjeç.
Polica e Shtetit njoftoi sot se në vijim të veprimeve të thelluara, Departamenti i Policisë Kriminale në DPPSH, nëpërmjet strukturës së specializuar në varësi të tij, bëri të mundur zbulimin e itinerarit të autorit kryesor të dyshuar për këtë ngjarje, i cili po lëvizte nga Sarajeva në Stamboll me destinacion kryeqytetin e Gjeorgjisë.
Informacionin e siguruar për vendndodhjen e autorit kryesor të kësaj ngjarjeje, Departamenti për Marrëdhëniet Ndërkombëtare në DPPSH, nëpërmjet Interpol Tiranës e ka shkëmbyer në kohë reale me Interpol Ankaranë.
Në kuadër të operacionit policor “TRACKING”, policia turke, bazuar në informacionin e marrë nga Policia Shqiptare e cila kishte ndjekur lëvizjet e autorit të dyshuar, bëri të mundur kapjen e shtetasit K.J., 40 vjeç, i cili është deportuar në Rinas mesditën e sotme. Në momentin e kapjes në aeroportin e Stambollit, Policia Turke, gjatë kontrollit fizik, i gjeti me vete një shumë prej 7500 euro.
Po në vijim të hetimeve të thelluara nga Departamenti i Policisë Kriminale, nëpërmjet strukturës së specializuar në varësi të tij, në bashkëpunim me DVP Shkodër, është bërë i mundur edhe lokalizimi i dy autorëve të tjerë dhe bashkëpunohet ngushtësisht me homologët për kapjen e tyre.
Më datë 09.08.2024, rreth orës 18:00, në sheshin Zdrale, Shkodër, këta shtetas, nëpërmjet mashtrimit, i kanë marrë pronarit të një pike të këmbimit valutor, shtetasit E.I., shumën prej 140 000 euro dhe më pas janë larguar menjëherë nga Shqipëria.
Si rezultat i veprimeve intensive hetimore të kryera nga Sektori për Hetimin e Krimeve Ekonomike dhe Financiare në DVP Shkodër, pas kallëzimit nga pronari i një exchange, se 3 shtetas e kishin mashtruar në exchange, duke i marrë një shumë parash në euro, u bë i mundur identifikimi i 3 autorëve të dyshuar.
Në vijim të veprimeve, janë shpallur në kërkim edhe dy autorët e tjerë të dyshuar, shtetasit gjeorgjianë G.T., 45 vjeç dhe B.T., 36 vjeç, për veprat penale “Mashtrimi” i kryer në bashkëpunim.
Në bashkëpunim me Prokurorinë, vijojnë veprimet intensive për dokumentimin e plotë ligjor të këtij rasti.
Policia e Shtetit falënderon Policinë turke për reagimin në kohë dhe bashkëpunimin profesional që çoi në finalizimin e operacionit policor TRACKING.
