Legjenda e Formula 1, Michael Schumacher është shfaqur për herë të parë në publik 11 vite pas aksidentit të rëndë që pësoi në 2013. Sipas mediave gjermane, 55-vjeçari mori pjesë në dasmën e vajzës së tij Gina Maria në vilën e familjes në Majorca të shtunën e kaluar. Rikujtojmë se Schumacher pësoi një aksident që i ndryshoi jetën në dhjetor të vitit 2013 teksa po bënte ski në Alpet Franceze ku kishte goditur kokën në një shkëmb, pavarësisht se kishte veshur një helmetë.
Që nga kthimi i tij në shtëpinë e tij në Liqenin e Gjenevës në vitin 2014, ai ka kërkuar kujdes të vazhdueshëm mjekësor nga gruaja e tij Corinna dhe një ekip profesionistësh. Corinna ka qenë mjaft e kujdesshme ndaj privatësisë së bashkëshortit të saj, duke kufizuar vizitat tek një grup i përzgjedhur miqsh dhe familjarësh dhe duke bërë të ditur shumë pak detaje nga gjendja e tij.
Megjithatë së fundmi raportohet se Schumacher ka bërë një dalje të rrallë publike në dasmën e vajzës së tij, ku 27-vjeçarja u martua me Iain Bethke në një ceremoni luksoze. Për të ruajtur privatësinë e Schumacher, të ftuarve të dasmës iu kërkua të linin celularët e tyre në hyrje për të parandaluar çdo foto të paautorizuar. Në një intervistë të vitit 2021, Corinna ndau përvojën e saj të kujdesit për burrin e saj, duke u shprehur se “i mungon Michael çdo ditë”.
Nuk më mungon vetëm mua. Janë fëmijët, familja, babai i tij, të gjithë rreth tij. Të gjithëve u mungon Michael, por Michael është këtu – i ndryshëm, por këtu. Ai ende më tregon se sa i fortë është çdo ditë. Ne jetojmë së bashku në shtëpi. Ne bëjmë terapi. Ne bëjmë gjithçka që mundemi për ta bërë Michael më të mirë dhe për t’u siguruar që ai të ndihet rehat. Dhe thjesht për ta bërë atë të ndiejë familjen tonë, lidhjen tonë. Dhe pa marrë parasysh çfarë, unë do të bëj gjithçka që mundem.
Ne të gjithë do ta bëjmë. Ne po përpiqemi të vazhdojmë si familje, ashtu siç i pëlqente Michael dhe e bën akoma. Dhe ne po vazhdojmë me jetën tonë. Është shumë e rëndësishme për mua që ai të vazhdojë të shijojë jetën e tij private sa më shumë që të jetë e mundur. Michael gjithmonë na ka mbrojtur, dhe tani ne po mbrojmë Michael.
