Një djalë brazilian që ka lindur me dy penise i është nënshtruar operacionit për të hequr organin më të madh. Sipas mjekëve, rasti ndodh 1 në 5 milionë dhe është pasojë e një defekti të lindur. Mjekët në Universitetin Federal të Sao Paulos, fillimisht po planifikonin të hiqnin penisin e djathtë të dyvjeçarit, i cili ishte më i vogël. Por plani u ndërpre, pasi nëna e tij tha se vogëlushi urinonte vetëm nga më i vogli.
Ekzaminimet treguan se penisi i majtë nuk funksiononte siç duhet, sepse uretra e tij ishte shumë e ngushtë dhe pengonte urinën. Duke e detajuar rastin në ‘Journal of Pediatric Urology’, kirurgët nuk shpjeguan pse kjo ndërhyrje u krye vetëm kur ai ishte dy vjeç. Marcela Leal da Cruz dhe kolegët e saj që ishin pjesë e rastit thanë se defekti i njohur si difalia është vërejtur vetëm 100 herë në histori, me rastin e parë të njohur në vitin 1609. Ekspertët vlerësojnë se gjendja prek rreth 1 në çdo 5 deri në 6 milionë djem.
Difalia është e paqartë dhe nuk ka asnjë faktor të njohur rreziku, por mendohet se ndodh rastësisht kur organet gjenitale zhvillohen në mitër. Pacientët mund të kenë ose difali të plotë, kur të dy peniset janë të zhvilluara mirë, si për shembull në rastin e djalit brazilian, ose difali të pjesshme, kur njëri penis është më i vogël ose i deformuar. Sipas ‘MailOnline’, pak javë më parë është raportuar edhe rasti i një djali nga Uzbekistani, i cili kishte lindur me dy penise, plotësisht funksionalë. Vogëlushi nga kryeqyteti i vendit, Tashkenti, jetoi me këtë gjendje për shtatë vjet pa shqetësime fizike dhe ishte në gjendje të nxirrte urinë nga të dy peniset.
